Continúa o Proxecto de Fondo Galego (Marzo 2015)

16 abr 2015

Continúa o Proxecto de Fondo Galego (Marzo 2015)

Proxecto: Fortalecemento das capacidades locais para mellorar o acceso ao dereito a auga potable e saneamento a través da xestión integrada do recurso hídrico, nos 7 municipios da mancomunidade NASMAR, Honduras Socio local: Mancomunidade NASMAR

Financiado por: Fondo Galego de Cooperación e Solidariedade

Este proxecto enmárcase nun programa deseñado por ESF Galicia, a Mancomunidade NASMAR (Mancomunidade dos municipios costeiros do Golfo de Fonseca) e AHJASA (Asociacion Hondureña de Juntas de Agua), do que xa foi executada a primeira fase durante o ano 2014, coa financiación de Cooperación Galega da Xunta de Galicia.

Durante o mes de marzo levouse a cabo a capacitación de reforzo da metodoloxía de Planificación de Xestión do Recurso Hídrico, dirixido ao persoal técnico municipal e do socio local (dúas persoas por cada municipio e dúas de NASMAR). Nestas capacitacións incidiuse sobre a importancia da planificación hídrica e a utilidade dos PXIRH, e mostrouse o contido e os datos que deberían ter os informes PXIRH comunitarios e municipais, aínda que este contido pode ser adaptable as necesidades específicas de cada municipalidade.

Formación PGIRH Teórica

Levouse a cabo unha práctica de campo na comunidade de La Criba (municipio de San Lorenzo), onde se levantaron as fichas social e técnica. Esta comunidade xa ten sistema de abastecemento de auga, pero o seu funcionamento é defectuoso por ter case 20 anos de antigüidade. A Mancomunidade de NASMAR comprometeuse a facer o informe PXIRH desta comunidade e a realizar xestións para mellorar o seu sistema de abastecemento de auga.

Formación PGIRH Práctica

Así mesmo, comezaron as actividades relacionadas co estudo hidroxeolóxico na comunidade de La Grecia, municipio de Marcovia. O persoal técnico do InstitutoHondureño de Ciencias de la Tierra de la UNAH desprazouse ata San Lorenzo para socializar o estudo ante a asemblea da Mancomunidade de NASMAR, constituída polos sete alcaldes dos municipios que a conforman. Nese acto explicouse o contido do estudo e as súas fases, e fíxose incidencia na importancia do control da calidade da auga, xa que se busca que este estudo sirva tamén para sensibilizar a titulares de obrigas, responsabilidades e dereitos neste senso. Nese mesmo espazo estaban presentes actores de desenvolvemento con actividade na zona, como son Amigos de la Tierra España e o Comité para la Defensa y Desarrollo de la Flora y Fauna del Golfo de Fonseca (CODDEFFAGOLF). Durante esa mesma xornada, o persoal do IHCT, desprazouse á comunidade de La Grecia, onde socializou o estudo coa asemblea comunitaria. Posteriormente, leváronse a cabo tres xornadas para realizar o censo das fontes de auga, a selección dos pontos de mostreo e a recollida das mostras para o analizar parámetros físicos, microbiolóxicos, metais pesados e agroquímicos.